രാജ്യത്ത് സ്​ഥിതി അതീവ ഗുരുതരം;​​ കോവിഡ്​ ബാധിതർ മൂന്നുലക്ഷത്തിലേക്ക്. 2,023 മരണം

രാജ്യത്ത്​ കോവിഡിന്‍റെ രണ്ടാം തരംഗം അതിരൂക്ഷമാകുന്നു. പ്രതിദിന കോവിഡ്‌ ബാധിതർ മൂന്ന് ലക്ഷത്തിനടുത്ത്​. ഇരുപത്തിനാല് മണിക്കൂറിനിടെ 2,95,041 പേർക്ക്​ പുതുതായി രോഗം സ്​ഥിരീകരിച്ചു. കോവിഡ്​ മൂലം ഒറ്റ ദിവസം 2023 പേർക്ക്​ ജീവൻ നഷ്​ടപ്പെട്ടതായും ആരോഗ്യമന്ത്രാലയം അറിയിച്ചു.

തുടർച്ചയായ ഏഴാംദിവസവും​ കോവിഡ്​ ബാധിതരുടെ എണ്ണം രണ്ടുലക്ഷം കടന്നതോടെ​ ചികിത്സയിലുള്ളവരുടെ എണ്ണം 21,57,538 ആയി.

1,67,457പേർ കഴിഞ്ഞ ദിവസം രോഗമുക്തി നേടി​. ഇതോടെ രോഗമുക്തി നേടിയവരുടെ എണ്ണം 1,32,76,039 ആയതായും ആരോഗ്യമന്ത്രാലയം അറിയിച്ചു.

രാജ്യത്ത്​ ഇതുവരെ, 1,82,553 പേരാണ്​ കോവിഡ്​ ബാധിച്ച്​ മരിച്ചത്​. നിലവിൽ, ലോകത്ത്​ കോവിഡ്​ ബാധിതരുടെ എണ്ണത്തിൽ രണ്ടാംസ്​ഥാനത്താണ്​ ഇന്ത്യ. ഏറ്റവും കൂടുതൽ രോഗികൾ യു.എസിലാണ്​. 3,25,36,470 പേർക്കാണ്​ ഇതുവരെ യു.എസിൽ കോവിഡ് ബാധിച്ചത്​. ഇന്ത്യയിൽ 1,56,16,130 പേർക്കും.

13,01,19,310 പേരാണ്​ രാജ്യത്ത്​ ഇതുവരെ വാക്​സിൻ സ്വീകരിച്ചത്​. കോവിഡ്​ രണ്ടാം തരംഗം കൊടുങ്കാറ്റ്​ പോലെയെന്ന്​ പ്രധാനമന്ത്രി നരേന്ദ്രമോദി കഴിഞ്ഞദിവസം അറിയിച്ചിരുന്നു. കോവിഡ്​ വ്യാപനം രൂക്ഷമായ പശ്ചാത്തലത്തിൽ രാജ്യത്തെ അഭിസംബോധന ചെയ്യുകയായിരുന്നു അദ്ദേഹം. രാജ്യം അഭിമുഖീകരിക്കുന്ന വെല്ലുവിളി വലുതാണ്​.പക്ഷെ നമ്മൾ മറികടക്കും. കോവിഡിനെതിരെ രാജ്യം വലിയ പോരാട്ടത്തിലാണ്​.

ഓക്​സിജന്‍റെ ആവശ്യകത വർദ്ധിച്ചു വരികയും, ഓക്സിജൻ ക്ഷാമം നേരിടുകയും ചെയ്യുന്നുണ്ടെങ്കിലും അത്​ പരിഹരിക്കാനുള്ള നടപടികൾ ആരംഭിച്ചിട്ടുണ്ട്​. ഓക്​സിജന്‍റെയും മരുന്നിൻെയും വിതരണം വർദ്ധിപ്പിക്കാൻ സർക്കാറും സ്വകാര്യമേഖലയിലുള്ളവരും സംസ്ഥാനങ്ങളും ഒരുമിച്ചുള്ള പ്രവർത്തനത്തിലാണെന്നും മോദി പറഞ്ഞു.