അതിർത്തിയിലെ സമാധാനത്തിൽ വിട്ടുവീഴ്ചയില്ല: അരുണാചൽ എൽ.എ.സിയിൽ ചൈനീസ് പെട്രോളിംഗ് വ്യതിയാനങ്ങളെ തുറന്നുകാട്ടി ഇന്ത്യ
അരുണാചൽ പ്രദേശിൽ ഇന്തോ-ടിബറ്റൻ ബോർഡർ പോലീസും (ഐ.ടി.ബി.പി) ചൈനീസ് പീപ്പിൾസ് ലിബറേഷൻ ആർമിയും (പി.എൽ.എ) തമ്മിൽ മുഖാമുഖം വന്നതായുള്ള റിപ്പോർട്ടുകളിൽ ശക്തമായ പ്രതികരണവുമായി ഇന്ത്യ. അതിർത്തിയിലെ സമാധാനവും സ്ഥിരതയും ഉറപ്പാക്കാതെ ഉഭയകക്ഷി ബന്ധത്തിൽ പുരോഗതി സാധ്യമല്ലെന്ന് വിദേശകാര്യ മന്ത്രാലയം ബെയ്ജിംഗിന് കർശന മുന്നറിയിപ്പ് നൽകി. നിയന്ത്രണ രേഖയിൽ (എൽ.എ.സി) നിലവിലുള്ള പരമ്പരാഗത പട്രോളിംഗ് രീതികളിൽ നിന്നുള്ള ചൈനയുടെ ഏകപക്ഷീയമായ മാറ്റങ്ങൾ ആണ് ആവർത്തിച്ചുള്ള പ്രകോപനങ്ങൾക്കും സംഘർഷങ്ങൾക്കും കാരണമെന്ന് ന്യൂഡൽഹി തുറന്നടിച്ചു.
അതിർത്തിയിലെ നിർണായക വിശദീകരണത്തിന് പുറമെ, സൗത്ത് കോക്കസസ് മേഖലയിലെ നയതന്ത്ര സമവാക്യങ്ങൾ, പശ്ചിമേഷ്യൻ പ്രതിസന്ധികൾക്കിടയിലെ രക്ഷാദൗത്യങ്ങൾ, രാജ്യത്തിന്റെ പ്രതിരോധ കയറ്റുമതി മാനദണ്ഡങ്ങൾ എന്നിവയെക്കുറിച്ചും വിദേശകാര്യ മന്ത്രാലയം സമഗ്രമായ നയതന്ത്ര നിലപാടുകൾ വ്യക്തമാക്കി.
വിദേശകാര്യ മന്ത്രാലയ വക്താവ് രൺധീർ ജയ്‌സ്വാൾ ദ്വൈവാര പത്രസമ്മേളനത്തിൽ ആൺ ഇന്ത്യയുടെ നിലപാടുകൾ അസന്നിഗ്ധമായി വ്യക്തമാക്കിയത്.
1. അരുണാചൽ സംഘർഷം: ചൈനയുടെ പട്രോളിംഗ് ലംഘനങ്ങൾക്കെതിരെ നിലപാട്
അരുണാചൽ പ്രദേശിലെ സൈനിക വിന്യാസവുമായി ബന്ധപ്പെട്ട് ഐ.ടി.ബി.പി നേതൃത്വം നടത്തിയ പ്രസ്താവനകളെക്കുറിച്ചുള്ള മാധ്യമങ്ങളുടെ ചോദ്യങ്ങൾക്ക് മറുപടിയായി, വിദേശകാര്യ മന്ത്രാലയ വക്താവ് രൺധീർ ജയ്‌സ്വാൾ ഇന്ത്യയുടെ തന്ത്രപരമായ വിലയിരുത്തൽ വ്യക്തമാക്കി:
"മുമ്പും ചൂണ്ടിക്കാണിച്ചിട്ടുള്ളതുപോലെ, വ്യവസ്ഥാപിതമായ പട്രോളിംഗ് രീതികളിൽ നിന്ന് ചൈനീസ് സേന വ്യതിചലിക്കുമ്പോഴാണ് ഇന്ത്യ-ചൈന അതിർത്തി മേഖലകളിൽ അസ്വസ്ഥതകൾ ഉണ്ടാകുന്നത്."
2. വിവിധ മേഖലകളിലെ നയതന്ത്ര ചലനങ്ങൾ
സൗത്ത് കോക്കസസ്, പേർഷ്യൻ ഗൾഫ്, അന്താരാഷ്ട്ര കൂട്ടായ്മകൾ എന്നിവയുമായി ബന്ധപ്പെട്ട് ഇന്ത്യയുടെ നിലപാടുകൾ വിശദീകരിക്കപ്പെട്ടു:
ബാക്കു നയതന്ത്രം
ബിഷ്‌കെക്കിലെ എസ്.സി.ഒ ഉച്ചകോടിയുടെ തുടർച്ചയായി വിദേശകാര്യ മന്ത്രി ഡോ. എസ്. ജയശങ്കർ അസർബൈജാൻ പ്രസിഡന്റ് ഇൽഹാം അലിയേവ്, വിദേശകാര്യ മന്ത്രി ബെയ്‌റമോവ് എന്നിവരുമായി ബാക്കുവിൽ കൂടിക്കാഴ്ച നടത്തി. കണക്റ്റിവിറ്റി, ഊർജം, സുരക്ഷ, ഭീകരവിരുദ്ധ പോരാട്ടം എന്നിവക്കൊപ്പം അസർബൈജാൻ-അർമേനിയ സമാധാന കരാറിനെയും ഇന്ത്യ സ്വാഗതം ചെയ്തു.
പശ്ചിമേഷ്യൻ ഒഴിപ്പിക്കൽ
ഊർജ അടിസ്ഥാന സൗകര്യങ്ങൾക്കും ദമാം വിമാനത്താവളത്തിനും നേരെയുണ്ടായ ആക്രമണങ്ങളുടെ പശ്ചാത്തലത്തിൽ, സൗദി അറേബ്യയിൽ കുടുങ്ങിയ 3,000 തീർഥാടകർ ഉൾപ്പെടെ 13,000-ത്തോളം ഉംറ തീർത്ഥാടകരെ സുരക്ഷിതമായി തിരിച്ചെത്തിച്ചു. റിയാദിലും ജിദ്ദയിലും 24 മണിക്കൂറും പ്രവർത്തിക്കുന്ന കൺട്രോൾ റൂമുകൾ സജ്ജമാണ്.
പ്രതിരോധ കയറ്റുമതിയും നിയന്ത്രണങ്ങളും
യൂറോപ്പ് വഴി വെടിക്കോപ്പുകൾ സംഘർഷ ബാധിത മേഖലകളിലേക്ക്എ ത്തുന്നുവെന്ന ഊഹാപോഹങ്ങളെ തള്ളിയ വിദേശകാര്യ മന്ത്രാലയം, 'മേക്ക് ഇൻ ഇന്ത്യ' പ്രതിരോധ കയറ്റുമതി പൂർണ്ണമായും ആഭ്യന്തര നിയമങ്ങൾക്കും അന്താരാഷ്ട്ര ആയുധ നിർവ്യാപന ഉടമ്പടികൾക്കും വിധേയമാണെന്ന് വ്യക്തമാക്കി.
3. അയൽപക്ക നയതന്ത്രവും സമുദ്ര സുരക്ഷയും
പാകിസ്ഥാൻ സന്ദർശനത്തിനിടെ സാർക്ക് പുനരുജ്ജീവിപ്പിക്കണമെന്ന മാലിദ്വീപ് പ്രസിഡന്റിന്റെ പ്രസ്താവനയോട്, പ്രാദേശിക സഹകരണത്തെ പിന്തുണയ്ക്കുന്നുവെന്നും എന്നാൽ സാർക്കിന്റെ പ്രവർത്തനം സ്തംഭിപ്പിച്ച സാഹചര്യങ്ങളും അതിന് ഉത്തരവാദിയായ രാജ്യവും ഏതാണെന്ന് എല്ലാവർക്കും വ്യക്തമാണെന്നും ഇന്ത്യ പ്രതികരിച്ചു. കൂടാതെ, പുതിയ മാലിദ്വീപ്-പാകിസ്ഥാൻ പ്രതിരോധ കരാറുകൾ നിരീക്ഷിച്ചുവരികയാണെന്നും ആവശ്യമായ നടപടികൾ സ്വീകരിക്കുമെന്നും ഇന്ത്യ കൂട്ടിച്ചേർത്തു.
യെമനിലെ ഹൂതി നിയന്ത്രണത്തിലുള്ള തുറമുഖ നഗരമായ ഹൊദൈദയിൽ ഒരു ദോവിൽ (dhow) ഉണ്ടായിരുന്ന 14 ഇന്ത്യക്കാരും സുരക്ഷിതരാണെന്ന് മന്ത്രാലയം സ്ഥിരീകരിച്ചു. ഇവരുടെ ക്ഷേമവും സുരക്ഷിതമായ തിരിച്ചുവരവും ഉറപ്പാക്കാൻ നയതന്ത്ര ചാനലുകളും പ്രാദേശിക പ്രവാസി കൂട്ടായ്മകളും വഴി പ്രവർത്തനങ്ങൾ ഏകോപിപ്പിക്കുന്നുണ്ട്.
ടെഹ്‌റാനിലേക്കുള്ള ജീവൻരക്ഷാ മരുന്നുകൾ ഇന്ത്യ തടഞ്ഞുവെന്ന വാർത്തകൾ അടിസ്ഥാനരഹിതമാണെന്ന് എം.ഇ.എ വ്യക്തമാക്കി. പശ്ചിമേഷ്യൻ വ്യോമപാതയിലെ നിയന്ത്രണങ്ങൾക്കിടയിലും മാനുഷിക പരിഗണന മുൻനിർത്തി ഇറാനിലേക്ക് മരുന്നുകൾ എത്തിക്കാനുള്ള വിമാന അനുമതികൾ ഇന്ത്യ തുടർന്നും നൽകുന്നുണ്ട്.
No comments