വാക്സിൻ എടുക്കാത്തവർക്ക് നിയന്ത്രണമേർപെടുത്താനൊരുങ്ങി യു.എ.ഇ

വാക്​സിനെടുക്കാത്ത പൗരൻമാർക്കും താമസക്കാർക്കും നിയന്ത്രണമേർപെടുത്താനൊരുങ്ങി യു.എ.ഇ. ദേശീയ ദുരന്ത നിവാരണ സമിതിയാണ്​ ഇക്കാര്യം അറിയിച്ചത്​. വാക്​സിനെടുക്കാത്ത 16 വയസിന്​ മുകളിലുള്ളവർക്ക്​ സഞ്ചാര നിയന്ത്രണം ഉൾപെടെ ഏർപെടുത്താനാണ്​ യു.എ.ഇ ആലോചിക്കുന്നത്​. ഇവർക്കുള്ള വിവിധ സേവനങ്ങൾ നിർത്തിവെക്കുന്നതും ആലോചിക്കുന്നു.

വാക്​സിനെടുക്കാത്തവർക്ക്​ ചില മേഖലകളിലേക്ക്​ പ്രവേശനം വിലക്കുവരും. വാക്​സിനെടുക്കാത്തവർ മറ്റുള്ളവരുടെ ജീവന്​ ഭീഷണിയുണ്ടാക്കുന്നുവെന്നും, അതിനാൽ എത്രയും വേഗം തൊട്ടടുത്ത വാക്​സി​ൻ കേന്ദ്രത്തിലെത്തി കുത്തിവെപ്പെടുക്കണമെന്നും ദുരന്ത നിവാരണ സമിതി അറിയിച്ചു.

കോവിഡി​ന്റെ വകഭേദത്തിൽ നിന്ന്​ സമൂഹത്തെ രക്ഷിക്കാൻ വാക്​സിനേഷൻ നിർബന്ധമാണ്​. വാക്​സിൻ നിഷേധിക്കുന്നതും വൈകിക്കുന്നതും സമൂഹത്തിന്​ ഭീഷണിയാണ്​. ആരോഗ്യ പ്രശ്​നങ്ങളുള്ളവർ ഡോക്​ടറെ സമീപിച്ച്​ വാക്​സിൻ എടുക്കാൻ കഴി​യുമോ എന്ന്​ അന്വേഷിക്കണം.

അതേസമയം, ഏതൊക്കെ രീതിയിലുള്ള നിയന്ത്രണങ്ങളാണ്​ നടപ്പാക്കുന്നത്​ എന്നോ എന്ന്​ മുതൽ നടപ്പാക്കു​മെന്നോ ദുരന്ത നിവാരണ സമിതി വ്യക്​തമാക്കിയിട്ടില്ല. യു.എ.ഇയിൽ 100 ശതമാനം ജനങ്ങൾക്കും വാക്​സിൻ ലഭ്യമാക്കുക എന്നതാണ്​ സർക്കാർ നയം. നിലവിൽ 65 ശതമാനം വാക്സിനേഷൻ പൂർത്തീകരിച്ചിട്ടുണ്ട്​. ​

60 വയസിന്​ മുകളിലുള്ള 74 ശതമാനം പേർക്ക്​ വാക്​സിൻ നൽകി. ബാക്കിയുള്ളവർ മടിച്ചു നിൽക്കുന്ന സാഹചര്യത്തിലാണ്​ നടപടി കർശനമാക്കിയത്​. എല്ലാ എമി​റേറ്റുകളിലും വാക്​സിൻ വിതരണ​ കേന്ദ്രങ്ങൾ സ്​ഥാപിച്ചിട്ടുണ്ട്​. സിനോഫാം, ഫൈസർ, അസ്​ട്രസിനിക എന്നീ വാക്​സിനാണ്​ യു.എ.ഇയിൽ വിതരണം ചെയ്യുന്നത്​. റഷ്യയുടെ സ്​പുട്​നിക്​ വൈകാതെയെത്തുമെന്ന്​ പ്രതീക്ഷിക്കുന്നു. ഇതുവരെ 95 ലക്ഷം ഡോസ്​ വാക്​സിനാണ്​ യു.എ.ഇ നൽകിയത്​. 50 ലക്ഷം പേർക്ക്​ ആദ്യ ഡോസ്​ നൽകി. യു.എ.ഇയിൽ നിന്ന്​ വിദേശരാജ്യങ്ങളിലേക്കും വാക്​സിൻ കയറ്റി അയച്ചിരുന്നു.