ക്വറ്റയിൽ ബോംബ് സ്ഫോടനം: 26 പേർ കൊല്ലപ്പെട്ടു, നിരവധി പേർക്ക് പരിക്ക്

പാകിസ്ഥാനിലെ തെക്കുപടിഞ്ഞാറൻ ബലൂചിസ്ഥാൻ പ്രവിശ്യയിൽ സ്ഥിതിചെയ്യുന്ന ക്വറ്റയിൽ ബോംബ് സ്ഫോടനം. ക്വറ്റയിലെ പ്രധാന റെയിൽവേ സ്റ്റേഷനിൽ നടന്ന പൊട്ടിത്തെറിയിൽ സൈനികർ ഉൾപ്പെടെ 26 പേർ കൊല്ലപ്പെടുകയും 14 പേർക്ക് പരിക്കേൽക്കുകയും ചെയ്തു. പ്രാദേശിക സമയം രാവിലെ 8:45-നാണ് (ഇന്ത്യൻ സമയം 10:15) പൊട്ടിത്തെറിയുണ്ടായത്. ബലൂച് ലിബറേഷൻ ആർമി (ബിഎൽഎ) ആക്രമണത്തിൻ്റെ ഉത്തരവാദിത്തം ഏറ്റെടുത്തു.

പാക് സൈനികർ പരിശീലനം പൂർത്തിയാക്കി തിരികെ പോകാൻ തയ്യാറെടുക്കുമ്പോൾ ഇവർ അടക്കമുള്ള യാത്രക്കാരെ ലക്ഷ്യമിട്ടായിരുന്നു ഈ ആക്രമണം. ആക്രമണത്തിൽ 46 സുരക്ഷാ സേനാംഗങ്ങൾക്കും 14 സാധാരണക്കാർക്കും പരിക്കേറ്റിട്ടുണ്ട്, അതിൽ പലരുടെയും നില ഗുരുതരമാണെന്ന് ക്വറ്റയിലെ സാൻഡെമാൻ പ്രവിശ്യാ ആശുപത്രി വക്താവ് വസീം ബൈഗിനെ ഉദ്ധരിച്ച് ദേശീയ മാധ്യമം റിപ്പോർട് ചെയ്തു. ബലൂചിസ്ഥാനിലെ ഏറ്റവും വലിയ ആക്രമണങ്ങളിൽ ഒന്നായാണ് ഈ ആക്രമണം കണക്കാക്കുന്നത്. വർഷങ്ങളായി പ്രതിസന്ധികളും വിപത്തുകളും അനുഭവിക്കുന്ന പ്രവിശ്യയിൽ ഉയർന്നുവരുന്ന പുതിയ വെല്ലുവിളികളിലേക്കും ഏറ്റുമുട്ടലുകളിലേക്കും ശ്രദ്ധ കേന്ദ്രീകരിക്കുന്നു.

പാക് സൈന്യത്തെയാണ് ഈ ആക്രമണം ലക്ഷ്യമാക്കിയതെന്ന് ബിഎൽഎ പ്രസ്താവിച്ചു. “ബലൂചിസ്ഥാനിൽ പാക് ഭരണകൂടത്തിന്റെ നടപടികൾക്കെതിരായ പ്രതികാരമായാണ് ഈ ആക്രമണം നടത്തിയത്,” എന്നാണ് അവർ പ്രസ്താവനയിലൂടെ വ്യക്തമാക്കിയത്. വിഭവ നിയന്ത്രണം, സ്വയംഭരണ അവകാശങ്ങൾ, അവികസനം എന്നിവ സംബന്ധിച്ച പ്രശ്നങ്ങൾ ചൂണ്ടിക്കാണിച്ചുകൊണ്ടുള്ള ബലൂചിസ്താൻ വിഘടന വാദികളുടെ പഴയ പരാതികൾ വീണ്ടും ഈ ആക്രമണത്തെ തുടർന്ന് ഉയർന്ന വരുന്നുണ്ട്.

പാക് പ്രധാനമന്ത്രി ഷെഹ്ബാസ് ഷെരീഫ് ഈ ആക്രമണത്തെ ശക്തമായി അപലപിച്ചു. അക്രമികൾ “കനത്ത വില നൽകേണ്ടി വരും” എന്ന് പ്രസ്താവനയിലൂടെ അറിയിച്ചു. "ബലൂചിസ്ഥാനിലെ സമാധാനത്തെ തകർക്കാൻ ഈ തരം ഭീകരപ്രവർത്തനങ്ങൾ കഴിയില്ല," എന്നാണ് പ്രധാനമന്ത്രിയുടെ ഓഫീസ് നൽകിയ പ്രസ്താവന. പ്രവിശ്യയിലെ പ്രധാന സ്ഥലങ്ങളിൽ കൂടുതൽ സുരക്ഷ ഉറപ്പാക്കാൻ അദ്ദേഹം നിർദ്ദേശം നൽകിയിട്ടുണ്ട്.

അഫ്ഗാനിസ്ഥാൻ്റെയും ഇറാൻ്റെയും അതിർത്തിയിലുള്ള ബലൂചിസ്ഥാൻ പ്രവിശ്യ പാകിസ്ഥാനെ സംബന്ധിച്ചിടത്തോളം തന്ത്രപ്രധാനമായ  പ്രദേശമാണ്. ചൈന-പാകിസ്ഥാൻ ഇക്കണോമിക് കോറിഡോർ (CPEC) പോലുള്ള തന്ത്രപ്രധാന പദ്ധതികൾ ഈ പ്രദേശത്ത്കൂടെയാണ് കടന്ന് പോകുന്നത്. ഗ്വദാർ തുറമുഖത്തെ ചൈനയുമായി ബന്ധിപ്പിക്കുന്ന റോഡുകൾ, റെയിൽവേ ലൈനുകൾ എന്നിവയുടെ നിർമ്മാണം നിലവിൽ മേഖലയിൽ നടന്നു കൊണ്ടിരിക്കുകയാണ്. എന്നാൽ എക്കാലത്തും ഈ പദ്ധതികൾ ലക്ഷ്യമാക്കി ബലൂചിസ്താൻ വിഘടന വാദി സംഘടനകൾ  പ്രവർത്തിക്കുന്നത് മേഖലയിലെ സമാധാന ശ്രമങ്ങൾക്കും വികസനപ്രവർത്തിനും വെല്ലുവിളിയാണ്.